كيكة شوكولاتة جاهزة بعد ما تصبيها في صينية مدهونة على شكل بولة اعملي خلطة مكونة من علبة 200 جرام جبنة فيلادلفيا + بيضة ومعلقتين سكر وشوية فانيليا ، تقلبيهم مع بعض وتحطيها في نص عجينة الكيك وتدخليها الفرن لحد ما تستوي.
طبعا لما تستوي هتبقى الجبنة في النص زي الحشو.
لما تبرد تعملي صوص مكون من : كوب كريمة سائلة تخفق ، علبتين كاسترد المراعي جاهزة، تقلبيها مع الكريمة وبعدين تصبيها فوق الكيكة.
في الوقت دا تحمصي شوية جوز هند مبشور وترشيها فوق الكريمة ودخليها الثلاجة.
لما تبرد كويس كليها بالهنا والشفا
:
* 3بياض بيض ، 12معلقة سكر بودرة ،رشة ملح ملعقة عصير ليمون
*تضربي البياض بمضرب البيض لحد ما يكون رغاوي بعدين تضيفي الملح وعصير الليمون.
*تكملي ضرب البيض لحد ما يبقى لونه ابيض بعدين تبدأي تضيفي السكر شوية شوية يعني من غير ما توقفي الضرب تحطي السكر لحد ما تخلصي الكمية. في الوقت دا لو حبيتي تلونيه حطي اللون اللي عايزاه.
*بعدين تحطيها في كيس حلواني وتدهني صينية فرن خفيف بالزيت أو تحطي ورقة زبدة وتبدأي تحطي المارينج.
تكوني فاتحة الفرن قبلها بعشر دقائق على اوطى حاجة. بعدين تحطي المارينج لمدة مثلا ربع ساعة وتبصي عليه لو لقتيه مسك شوية بس شويه تقفلي عليه الفرن وخليه جوة الفرن لحد ما يبرد الفرن خاااالص بعدين طلعيه هتلاقيه نشف بس من غير لونه ما يتغير.
يالة يابنات وقت الحلو. حلوة سهلة لذيذة ومكوناتها موجودة في اي بيت
بريد بودن فيها مج: بواقي عيش فينو قطعيه شرائح ورصيه في صينية
فرن مدهونة زبدة. بعدين حضري خلطة مكونة من: كوب حليب ، بيضتين، نص أو اقل
كوب سكر ، ربع ملعقة فانيليا ورشة بكينج باودر ومعلقة صغيرة زبدة سايحة.
كله يقلب مع بعضه وتوضع فوق العيش وتوضع في صينية اكبراية. على أساس أنها تستوي في حمام ماية.
تدخل الفرن لحد ما تستوي ووشها يحمر بتاخد تقريبا ساعة على نار متوسطة. وبس
أكلة خفيفة لذيذة ظريفة تنفع للريجيم.
فرخة مقطعة منزوعة الجلد ومغسولة كويس حتحطيها على النار مع بصلة مقطعة شرائح وفصين ثوم ومعلقتين زيت زيتون وملح وفلفل وبهارات وشوية كمون ومعلقتين ماية لما تتحمر شوية وطي عليها النار وغطيها وسبيها تستوي. بعد ما يمر وقت وتستوي افتحي الغطا وحطي نص كيس خضار مشكل وارجعي غطيها تاني. ولما يستوي انقليها في طبق فرن وحطي عليها الخلطة دي ( علبة زبادي قليل الدسم ثلاث معالق مايونيز قليل الدسم معلقة طحينة ثلاث مثلثات لافاش كيري قليل الدسم وشوية ملح وفلفل وبهارات وممكن قرفة بيدي نكهة حلوة وتصبيها فوق الفراخ ودخليها تحت الشواية تاخد لون. تقدم مع أرز بسمتي بالفلفل الأخضر والجزر المبشور وطبعا لا غنى عن طبق السلطة.
وبالهنا والشفا
الغدا النهارة :
بفتيك فراخ وبطاطس مقليين في الفرن.
تجيبي صدور الفراخ وتبليها ملح فلفل كركم بهارات مشكلة ، حطيها في الثلاجة ساعة تقريبا بعدين طلعيها وحطيها في بياض بيض عليه ملح وفلفل ثم في البقسماط بعدين تحطي شوية زيت في صاج وتحطي قطع الفراخ في الصاج بس تقلبيه في الزيت وتدخليها الفرن على نار عالية بس تخللي بالك وتقلبيه علشان ما يتحرقش.
البطاطس : تقشريها وتقطعيها تخين شوية وتبليها ملح وشوية بابريكا للنكهة وقلبيهم في معلقتين زيت تقريبا وافرديها في صاج ودخليها الفرن مع الفراخ وبرضو خاللي بالك تقلبيه من وقت للتاني لحد ما تتحمر.
الصلصة : نص علبة زبادي قليل الدسم عليه ربع كوب مايونيز شوية ملح وملعقتين جوز مفروم ومعلقة صغيرة فجل مفروم. يقلب جيدا ويقدم مع العيش المحمص.
وبالهنا والشفا.
دا غدا النهاردة. كفتة، مكرونة بالثوم، سلطة خضرا، سلطة طحينة، محمرة ، بطاطس مقلية
تسلقي المكرونة بعد ما تصفيها تحطي في الحلة معلقة زبدة وثوم مفروم الكمية زي ما انتي تحبي وشوية ملح وفلفل اسود بعدين ترجعي المكرونة للحلة تقلبيها وتغطيها وتحطي على الوش جبنة موزاريللا أو جبنة تركي أو شيدر يعني اللي موجود.
المحمرة : فلفل احمر مشوي مع زيت وملح وجوز كله يفرم مع بعض. وشوية شطة حمرا للي يحب
الكفتة: تبشري بصلة وفصين توم وملح وفلفل ونص معلقة صغيرة بكينج صودا قرفة وجنزبيل كله تتبل به اللحمة المفرومة ثم تشكل وتشوى على الشواية أو في الفرن.
اول حاجة تسلقي المكرونة وتحطيها على جنب.
تجيبي معلقة زيت زيتون تحطيها على وتفرمي 2ثومة وتحطيمهم 30 ثانية بعدين قطعي بصلة وقلبيهم دقيقتين بعدين حطي نص معلقة قشر ليمون بعدين حطي كمان معلقتين زيت زيتون وحطي بقدونس مفروم وربع كوب عصير ليمون وزيتون اخضر مفروم خشن تعملي تقليبه بعدين تحطي المكرونة على الخطة على النار وتقلبيهم وتوطي النار وسبيها شوية.
في نفس الوقت تكوني مسخنة طاسة وتحطي فيها سمك السالمون من غير اي دهون وتبليها ملح وكمون وشوية بهارات من على الجانبين لحد ما تتحمر.
تقفلي على المكرونة وتغرفي وتقطعي السمك وتحطيه على الوش.
ويقدم مع السلطة الخضرا المعتبرة. وبالهنا والشف
كوب وربع دقيق تضربيه في الخلاط مع نص كوب زبدة باردة مقطعة مكعبات و ربع كوب سكر بودرة، في ناس بتحب تحط صفار بيضة انا محطتش واستغنيت عنه بالماء البارد. بعدين تقلبيها في طبق عجن وتضيفي لها حوالي ثلاث معالق ماء بارد وتعجني بايدك بسرعة وبمجرد ما تلم معاكي يبقى خلاص المهم تبقى متماسكة مش طرية. ضعيها في ودخليها التلاجة بعد نص ساعة طلعيها وافرديها على الدقيق علشان بتلزق وافرديها براحة علشان مش تتقطع. بعدين تلفيها على النشابة علشان تعرفي تشيليها وضعيها في صينية التارت. ساويهافي الصينية وشيلي الزيادة بعدين خرميها بالشوكة ودخليها الفرن الساخن على درجة حرارة متوسطة. لما تستوي طلعيها وسبيها تبرد.
**في الوقت دا بتجيبي القرع المقطع مكعبات وتحطيه على النار مشوية ماية وربع كوب سكر ، لما تتطرى وتستوي تقفلي عليها وحطيها في الخلاط مع شوية فانيليا وعلبة صغيرة فيلادلفيا وتخلطيهم مع بعض بعدين دوبي معلقة كبيرة جيلاتين في حوالي معلقتين ثلاثة ماية دافئة مش سخنة وضفيها على القرع واخلطيهم تاني.
**لما التارت يبرد صبي عليه خليط القرع ودخليه الثلاجة يسقع كويس.
وبالهنا والشفا
ما تغسلي الفرخة اعملي خلطة عبارة عن ملح وفلفل وصلصة طماطم وكمون وممكن تحطي توم لو تحبي. تحطي الفرخة في الصبعد ينية وادهنيها بالخلطة ولو الصوص وقع منه شوية في الصينية سيبيها بعدين تحطيها في سيخ الفرن وافتحي الشواية ولازم طبعا تلف لمدة ساعتين تقريبا وتحطي الصينية تحت الفرخة وفيها شوية ماية علشان الفرخة تنقط فيها مش في البوتاجاز. ولما تخلص خدي الصوص اللي نزل منها وحطيه في الطبق. وكل شويه اسقيها من ميتها بس خاللي بالك على أيدك. ولو معندكيش سيخ الفرن بتاع الشواية جيبي الصينية وحطي عليها الشبك بتاع الفرن أو لو عندك واحد أصغر وحطي الفرخة عليها علشان تنزل مايتها في الصينية بس في الحالة دي تفتحي الفرن مش الشواية. وبس
: تجيبيها وتربطيها وتبليها ملح وفلفل وتحطي طاسة على النار فيها معلقة زيت واحدة ولما تسخن تحمري اللحمة من كل الجهات على نار عالية بعدين تحطيها في صينية فرن وتقطعي معاها بصل شرائح وبطاطساية وفلفل احمر وشوية ملح وفلفل وشوية ماية ودخليه الفرن على درجة حرارة متوسطة لمدة ساعة تقريبا.
في الوقت دا عملت خضار صيني : تقطعي كرنب جزر فلفل اخضر بصل اخضر لو عندك وخس كله يتقطع شرائح رفيعة بعدين تحطي طاسة على النار فيها معلقة زيت ولما تسخن حطي الجزر بعدين الفلفل بعدين الكرنب والبصل تفضلي تقلبي فيه علشان ما يتحرقش هتلاقيه دبل لازم النار تكون عالية بعدين تحطي معلقتين صويا صوص وبعدين الخس يتقلب معاهم وتقفلي.
طلعي اللحمة من الفرن وسبيها تبرد بعدين قطعيها شرائح ورشي عليها شوية فلفل اسود.
في طبق التقديم حطي الخضار الصيني وحواليه الخضار اللي كان مع اللحمة بعدين ترصي اللحمة.
يقدم مع الرز البسمتي بدون دهون وسلطة خضرا.
*
كوب سميد ، ٣/٤ كوب سكر ، ملعقة كبيرة بكينج باودر ، نص كوب جوز هند، ملعقتين كبيرة حليب بودرة ، علبة قشطة ، ١٠٠ جرام زبدة بحرارة الغرفة
تخلط المقادير الجافة أولا ثم يضاف إليها السوائل
تترك لترتاح ساعة تقريبا. ثم تفرد في صينية مدهونة وتدخل الفرن لحد ما وشها يحمر
يصب عليها الشربات الخفيف فو خروجها من الفرن.
ملاحظة ( الشربات لازم يكون بارد والبسبوسة سخنة)
