الفراخ الصيني

نص كيلو صدور فراخ تبلها ملح وفلفل ومعلقة خل كبيرة تنقع لمدة ساعة تقريبا. 

بعد مرور ساعة تحطيها في الدقيق وشوية بابريكا وتقليها في زيت غزير وتطلعيها على مناديل مطبخ. 

تحطي معلقتين زيت  في طاسة كبيرة وتحطي عليها( فلفل اخضر كبير مقطع معبات، بصل اخضر مقطع طوليا، جزر مقطع مكعبات، كرنب مقطع شرائح)

لازم النار تكون عالية تاخد تقليبه بعدين تحطي عليها الفراخ ويقلب كله مع بعضهعلى نار عالية لمدة دقيقتين تقريبا 

بعدين نضيف الصوص( ثلاث معالق كبيرة صويا صوص، معلقتين كاتشب، نص معلقة سكر صغيرة ، معلقة خل كبيرة)

يقلب لمدة دقيقة بعدين يضاف نص كوب ماء مذاب فيه معلقة صغيرة نشا. 

ويقدم مع الأرز البسمتي وبالهنا والشفا

كيكة بسبوسة:

كيكة سهلة سريعة وحلوة. 

كوب دقيق، كوب سميد، كوب زيت ، كوب جوز هند، علبة زبادي، بيضتين ، معلقة صغيرة بيكينج بادر وفانيليا 

كله يقلب مع بعضه بعدين تدهني صينية بالطحينة أو زيت وبدريها بالدقيق. 

دخليها الفرن لحد ما الأطراف تتحمر بعدين افتحي الشواية شوية علشان وشها يحمر. وأول ما تطلع تسقيها بالشربات.

كب كيك ولا أسهل

كوب نوتيللا، عشر معالق دقيق ، بيضتين، شوية فانيليا

كله يقلب مع بعضه بعدين نضعه في أكواب الكب الكيك وعلى الفرن الى ان يستوي.

كيكة التمر على طريقتي:

٤٠٠جرام تمر، ١٥٠ملل ماء، علبة حليب مبخر، علبة دانيت بالفانيليا، ١٥٠جرام سمنة كريسكو(الخاصة بالحلويات)لانها خفيفة. 

طبعا نشيل نوا التمر ونحط المقادير كلها على نار هادية لحد ما يطرى التمر. 

بعدين نسيبه يبرد. 

في الوقت دا نخلط ١٥٠ جرام دقيق مع شوية ملح ونص معلقة صغيرة بيكينج صودا. 

لما خليط التمر يبرد نضيفه لخليط الدقيق ويقلب جيدا ثم تصب في صينية مدهونة ومرشوشة دقيق وتدخل الفرن لحد ما تستوي. 

الكمية دي صغيرة يعني صينية صغيرة. 

الكيكة دي خفيفة وسكرها خفيف وجميلة. 

الكفتةالسويدية

• 
  

  اول حاجةلحمة مفرومة مع بصلة مبشورة بقسماط ملح فلفل نكورها ونحطها على طاسة فيها زبدة لحد ما تاخد لون

  نرصها في طبق فرن

  ونحط دقيق على الطاسة وشوية شوربة مع ملح وفلفل هتتقل بعدين نحط الكريمة ونصبها على الكفتة وتدخل الفرن 190 نص ساعة

الفطائر المحلاة

اول حاجة لكل 150 جرام دقيق تحطي 150 ملل حليب، بيضة شوية ملح وسكر ومعلقة كبيرة زبدة سايحة وشوية فانيليا ونص معلقة صغيرة بيكينج صودا. كله يتقلب مع بعض. 

طبعا بتزودي الكمية زي ما انتي عايزة.

بعدين بمغرفة الشوربة تبدأي تحطي كمية معقولة في الطاسة اللي مدهونة زبدة ولما تبدأ تطلع فقاقيع تقلبيه الناحية التانية

بعدين تعملي حشوة التفاح. تقطعي تفاح مكعبات وتحطيه على النار مع شوية سكر ومعلقة كبيرة ماية وتقلبيه لحد ما يعمل زي صوص شوية.

التقديم: بتجيبي واحدة فطيرة تدهنيها حتة زبدة صغيرة طبعا لازم تتآكل سخنة بعدين تحطي طبقة تفاح بعدين طبقة فطيرة تانية وعليها حتة زبدة برضه ورشة عسل نحل وممكن كريمة أو انا حطيت sour cream. 

اقتراحات أخرى للتقديم: الزبدة أساسي ، ممكن عسل، مربى، صوص فراولة، شوكولاتة نوتيللا

وجبة غدا

طيب وادي اكل النهاردة. هو يمكن تقليدي فراخ مشوية ورز. بس الفراخ انا عملتها المرة بطريقة مختلفة وقلت اشاركها معاكم. 

**الفرخة:بعد ما تغسليها كويس جيبي حتة زبدة وتبليها ملح وفلفل وبابريكا ومعلقة بودرة ثوم ودخليها تحت جلد الفرخة بعدين حشيتها بطاطس مكعبات وجزر وربطت رجليها وجناحِتها بعدين رشيت عليها ملح وفلفل وبهارات وحطيتها على شبك والشبك حطيتو على صينية. حطيت في الصينية ماية وقطعت جزر وبطاطس صغيرة غسلتها كويس وقسمتها بالنص وحطيتها معاها وجبت راس ثوم بقشره وقسمته بالنص وحطيتها معاها بيبقى حلو اوي وهو مشوي ونكهته خفيفة. بس دخلته الفرن على حرارة عالية وطبعا أخد بالي ان الماية اللي في الصينية ما تنشفش وكل شوية اسقي الفرخة لحد ما تستوي مش اقل من ساعتين.

** الرز: رز أمريكي عملته بزيت الزيتون وبشرت جزرة قلبته شوية في الزيت بعدين حطيت الرز وسويته.

وطبعا لما اطلع الفرخة أحط معلقة دقيق صغيرة في الصينية وشوية ماية لو الماية قليلة بعدين اسخنها شوية على النار بعدين تصفيها في طبق التقديم. وبالهنا والشفا. 

بعدين عملت مقبلات. 

**جبنة شيدر مقلية: نص كوب دقيق ، معلقتين سكر وشوية ملح وفلفل معلقة صغيرة نش نص معلقة صغيرة بكينج بودر ثلث كوب حليب تقلبه مع بيضة وتضيفها للدقيق بعدين كوب جبنة شيدر أو اي نوع تفضليه. سخني زيت وبالملعقة ابدأي حطي في الزيت وتخلي بالك علشان مش تتحرق. قدمتها مع sour cream. وبس.

جبنة شيدر مقلية

: نص كوب دقيق ، معلقتين سكر وشوية ملح وفلفل معلقة صغيرة نش نص معلقة صغيرة بكينج بودر ثلث كوب حليب تقلبه مع بيضة وتضيفها للدقيق بعدين كوب جبنة شيدر أو اي نوع تفضليه. سخني زيت وبالملعقة ابدأي حطي في الزيت وتخلي بالك علشان مش تتحرق. قدمتها مع sour cream. وبس.

كيكة الشوكولاتة:

معلقتين زبدة على النار مع ربع كوب كاكاو على نار واطية في الوقت دا اخفقي بيضتين مع كوب سكر كويس اوي بعدين ضيفي الزبدة بالكاكاو وقلبي تاني بعدين ضيفي 3/4 كوب دقيق وقلبي براحة 

ادهني صينية صغيرة وصبيها ودخليها فرن ساخن على درجة حرارة متوسطة لمدة ربع ساعة تقريبا. 

لما تطلع اعملي لها صوص :

معلقة صغيرة زبدة على معلقتين كاكاو ومعلقتين سكر وشوية حليب وسيحيهم في المايكرويف وصبيها على الكيكة لما تطلع من الفرن.

النوجة المثلجة

تحبوا تحلوا بحاجة حلوة وباردة وتنفع اوي للصيف.

30 جرام سكر
60 جرام عسل
4 ملعقة كبيرة ماء
2 بياض بيض
رشة ملح
50 جرام فواكه مشكلة مجففة
50 جرام مكسرات مشكلة
1 كوب كريمة خفق

يوضع السكر والعسل والماء في قدر على نار متوسطة مع الإستمرار في تنظيف حواف شراب السكر الملامسة للقدر بفرشاة مغموسة في المياه.
عندما يذوب السكر تماماً، ترفع درجة حرارة الموقد ليغلي الشراب ويصل لمرحلة الكرة اللينة.
يوضع بياض البيض في وعاء عميق ويخفق البياض حتى يصبح رخواً.
يصب خليط السكر وهو لايزال ساخناً بمنتهى البطء على بياض البيض مع الإستمرار بالخفق حتى يصبح مارنج إيطالي ويستمر بالخفق حتى يبرد تماماً ويتماسك.
تقلب الفواكه المشكلة المجففة بلطف مع المارنج.
تخفق الكريمة وتقلب بلطف مع المارنج.
يصب المارنج قوالب صغيرة ويحفظ في الفريزر.
ممكن تغلفي القوالب ببلاستيك الطعام لسهولة القلب.