فكرة عشا خفيف

دي شوية حاجات بسيطة ممكن تتعمل على العشا او في عيد ميلاد
اول حاجة التارت الصغير بعد ما تسويه تعملي صوص الجبنة الريكفورد(جبنة ريكفورد مع جبنة كريمي وشوية كريمة تضربيهم مع بعض وتبقى ثقيلة شوية علشان هتحطيها بكيس الحلواني وعلى الوش ممكن تحطي زيتون او بصل اخضر او شوية بابريكا انتي وذوقك)
التانية:(عبارة عن توست شايلين منه الأطراف وفردناه شوية بالنشابة ودهناه مستردة وحطينا شوية بصل اخضر وواحدة سوسيس ولفناها وحطناها في صينية ودهنتها زبدة وتدخل الفرن).
الثالثة:( نفس التوست بس الحشوة عبارة عن سكر وزبدة وقرفة وعلى الوش لما طلعت رشيت حليب مكثف)

معجنات إيطالية

**شوية جبنة تركي مع شوية جبنة كاسات مع 300 جرام دقيق و بيضتين وشوية ملح وفلفل كله يتعجن مع بعض بعدين تقسمي العجينة لثلاثة وتلفيها أسطوانة وتقطعيها زي الشكل دا. ( انا عملت نص الكمية) 

تحطي شوية زيت زيتون في طاسة وتحمريها من كل الجوانب مش بتاخد وقت. 

**في الوقت دا تعملي صلصة البيستو زيت زيتون مع صنوبر مع جبنة بارميزان وريحان طازة طبعا انا معنديش المكونات دي عملت حاجة تانية ( لوز مقشر مع نعناع طازة وزيت زيتون وجبنة تركي) 

وبس. دي لما تكوني زهقانة ولا جعانة وعايزة تعملي حاجة على السريع أو للاطفال برضو هيحبوها في وقت الفراغ

شوربة سي فود

راس السمكة وذيلها مش هعمل بيها حاجة فطبعا سلقتهم. حمرت بصل وتوم خفيف وكنت جايبة من السوبر ماركت تشكيلة بحريات بتتباع جاهزة ( كابوريا قطع جمبري حبار بلح البحر) اخدت التشكيلة دي وحطيتها على البصل ياخد تقليبة بعدين اخدت شوربة السمك وحطيتها عليه وتبليها ملح وكمون وفلفل وبهارات تاخد غلوة بعدين في الآخر شوية كريمة. وبالهنا والشفا

سمك التونة

تجيبي شرائح السمك تتبليه ملح وفلفل وليمون وتسخني طاسة كويس اوي مع نقطتين زيت وتحطي السمك على الناحيتين لحد ما يستوي تحطيه في طبق التقديم وتعملي الصوص. فص ثوم على النار مع نقطتين زيت وشوية ملح وقبل ما لونه يغير ضيفي ليمونة كبير ومعلقة خل صغير وشوية شبت اول ما تغلي اقفلي عليها صبي شوية فوق السمك والباقي في طبق غويط للي عايز زيادة.كنت مقطعة بصل شرائح وشوحته على خفيف مكان تحمير السمك. على فكرة ممكن نفس الطريقة تتعمل مع سمك السلمون

شعيرية الرز

 شعيرية الرز دي بتجبيها من السوبر ماركت قسم الأكل الصيني بتغلي ماية بعدين تقفلي النار وتحطي الشعيرية وتقلبيها براحة هتلاقيها بتفك معاكي لحد ما تطرى بعدين تكوني مجهزة ماية باردة جداً مع ثلج تنشليها من الماية السخنة وتحطيها مباشرة في الماية الباردة علشان توقف السوى ومش تعجن. تجهزي الخضار بتاعك انا حطيت كرنب احمر وبصل اخضر وجزر. ممكن تحطي بسلة أو فاصوليا خضرا زي ما انتي عايزة. نيجي للتتبيلة معلقتين ثلاثة زيت سمسم أو زيت زيتون علشان بيدي نكهة حلوة لو مفيش يبقى زيت نباتي عادي مفيش مشكلة وثلاث اربع معالق صويا صوص مع لمونة ونقطتين خل وتضيفي الخضار بتاعك وتقلبيه كويس وبالهنا والشفا. على فكرة ممكن تاكليها لوحدها كوجبة مغذية جداً وتشبع وتنفع كمان للريجيم

كفتة بالطحينة

كفتة بالطحينة:

تجيبي لحمة مفرومة تبليها ملح وفلفل وبصلة مبشورة وفص ثوم مدقوق 

بطاطس شرائح حمريها نص تحميرة وحطيها في قعر الصينية اللي هتستعمليها

كوريها وحطي معلقة زيت على النار وشوحيها لحد ما تتحمر بعدين حطيها في صينية فرن لو بايركس يبقى كويس علشان الشكل

دلوقتي جيبي نص كوب طحينة وعليه عصير ليمونة كبيرة مع معلقة خل صغيرة وشوية ملح وكمون وشوية ماية بحيث أنها تبقى خفيفة شوية وتقلبيها وصبيها على الكفتة ودخليها الفرن لحد ما تتقل وتنشف شوية 

بس تقدم مع الرز الأبيض أو من غير حسب ذوقك