الباباز
العجينة ١
معلقة صغيرة خميرة
١٠٠ ملل حليب دافئ
٢ بيضة مخفوقة
٢ صفار بيض
٥٠ جرام زبدة معبات
معلقة كبيرة سكر
نص معلقة صغيرة ملح
٢٥٠ جرام دقيق ( ربع كيلو)
الطريقة: تخفقي الزبدة علشان تتجانس مع نفسها بعدين تضيفي البيض ويخفق مع بعض بعدين تحطي الدقيق وتقلبي بعدين تضيفي الحليب والخميرة والسكر وتقلبيهم مع بعض كويس. المفروض تتكون عندك عجينة سائلة
تصبيها في طبق غويط وتغطيها وسبيها تخمر ساعة في مكان دافئ. ( ممكن تخلطي بايدك عادي مش لازم عجانة)
العجينة ٢
معلقة صغيرة خميرة
٣ بيض مخفوق
معلقة صغيرة ملح
معلقة صغيرة سكر
٧٥ جرام زبدة سايحة
١٠٠ ملل حليب دافئ
٢٥٠ جرام دقيق
الطريقة : هتحطي المقادير كلها مع بعض وتخلطيهم وتسيحي الزبدة على النار وتضيفها على الخليط وتخلط لمدة عشر دقائق تقريبا. في الوقت دا هيكون عدا ساعة على العجينة الاولى ، دلوقتي ضيفي العجينة التانية على العجينة الاولى وقلبيهم مع بعض وغطيها وسيبيها تخمر لمدة ساعة تانية
بعد مرور ساعة تجهزي قوالب البابا وتدهنيها ًزبدة ورشي فيها شوية دقيقة ولو قوالب سيلكون مش لازم تدهن.
تحطي العجينة في كيس حلواني وتعبي القوالب الثلث بس لأنك حتسبيها تخمر تاني لمدة ساعة.
تدخل بعد كدة الفرن لمدة ربع ساعة تقريبا او لحد ما تلاقيها اتحمرت.
طلعيها من الفرن وسبيها تبرد خاااالص
تعملي الشربات: لتر ماء ،٧٠٠ سكر ،عصير وبشر برتقالة، عصير وبشر ليمونة وعودين قرفة. كلهم على نار هادية وتقلبي لحد ما السكر يدوب. في الوقت دا هيكون البابا برد خالص.
هتشيلي وش البابا وتحطيها في الشربات وهو على نار هادية لمدة ثلاث اربع دقائق علشان تضمني انها اتشرفت كويس وبالملعقة تحطي عليها علشان تتشرب كويس بحيث انك لما تحطي ايدك عليها تلاقيها طرية
تشيليها براحة بالمصفى وتحطيها على شبك علشان تصفي الزيادة
دلوقتي تعملي الكريمة : اولا : كريم باتسيير : معلقتين دقيق على النار عليهم كوب حليب مذوب فيه معلقتين سكر كبار وشوية فانيليا تقلبي كويس علشان مش يكلكع بعدين تسيبيه يبرد خالص
دلوقتي بعد ما يبرد تعملي كريم شانتيه انا حطيت ٢ باكيت كريم شانتيه ومعاهم حوالي اربع معالق حليب بارد علشان يبقى تقيل بعدين حطيت عليه الكريم باتسيير وخفقتهم مع بعض علشان يندمجوا كويس.
دلوقتي تجهزي كيس الحلواني بتاعك وتزيني زي ما انا عاملة كدة وممكن تزيني كمان بأي نوع فاكهة لو تحبي
وبس بالهنا والشفا.